ನಾಗಿರಿ ಲಿಪಿಂತ್ಲೊ ದೊ ಆಸ್ಟಿನ್ ಡಿ’ಸೋಜಾ ಪ್ರಭು ಹಾಚೊ ೩೫೦೦ ಕವಿತೆಂಚೊ ಪುಂಜೊ "ವಜ್ರಾಂ" ಹಾಚೆಂ ಉಗ್ತಾವಣ್ ಹ್ಯಾಚ್ ಜನೆರ್ ೬ ತಾರಿಕೆರ್ ಗೊಂಯ್ಚ್ಯಾ ಥೋಮಸ್ ಸ್ಟೀಫನ್ಸ್ ಕೊಂಕಣಿ ಕೇಂದ್ರಾಂತ್ ಸಾಂಜೆರ್ ಪಾಂಚ್ ವೊರಾರ್ ಜಾಲೆಂ. ಹೆಂ ಪುಸ್ತಕ್ ಶ್ರೀ ಆನ್ಸಿ ಪಾಲಡ್ಕಾಂತ್ ನಾಗಿರಿಂತ್ ಲಿಪ್ಯಾಂತರ್ ಕರುನ್ ಆಪ್ಲ್ಯಾ ಪ್ರೀಯಾ ಪ್ರಕಶನಾ ದ್ವಾರಿಂ ಪ್ರಕಟ್ ಕೆಲಾಂ.

ಗೊಂಯ್ಚ್ಯಾ ವಿಧಾನ್ ಸಭೆಚೊ ಆದ್ಲೊ ಸ್ಪೀಕರ್ ತಶೆಂಚ್ ಗೋವಾ ತಿಯಾತ್ರ್ ಅಕಾದೆಮಿಚೊ ಪಯ್ಲೊ ಅಧ್ಯಕ್ಷ್ ಶ್ರೀ ತೊಮಾಜಿನೊ ಕಾರ್ಡೊಜೊನ್ ಹ್ಯಾ ಪುಸ್ತಕಾಚೆಂ ಉಗ್ತಾವಣ್ ಕೆಲೆಂ. ನಾಂವಾಡ್ದಿಕ್ ಕವಿ ತಶೆಂಚ್ ಶ್ರೀಲಂಕಾ ರೇಡಿಯೆಚೊ ಆದ್ಲೊ ನಿರ್ದೇಶಕ್ ಶ್ರೀ ಯೂಸುಫ್ ಶೇಕ್ ಕಾರ್ಯಾಚೊ ಮುಕೇಲ್ ಸಯ್ರೊ ಜಾವ್ನಾಸ್‌ಲ್ಲೊ. ಕೇಂದ್ರಾಚೊ ದಿರೆಕ್ತೊರ್ ಬಾಪ್ ಪ್ರತಾಪ್ ನಾಯ್ಕ್ ಹಾಣಿ ಕಾರ್ಯಾಚೆಂ ಅಧ್ಯಕ್ಷ್ ಸ್ಥಾನ್ ಸೊಬಯಿಲ್ಲೆಂ.

"ಕೊಂಕ್ಣಿ ಕವಿ, ಬರಯ್ಣಾರ್ ಆನಿ ಕಲಾಕರ್ ಕಾಂಟ್ಯಾಂ ಮಧೆಂ ಫುಲ್ಚ್ಯಾ ಗುಲೊಬಾ ಬಾಶೆನ್, ಜೆ ಸಗ್ಳ್ಯಾ ಕಾಂಟ್ಯಾ ಖುಂಟ್ಯಾಂ ಮಧೆಂ ಪಾಸೂನ್ ಫುಲೊನ್ ರಾವ್ತಾತ್ ಆನಿ ಸಂಸಾರಾಕ್ ಆಪ್ಲೊ ಪ್ರಕಾಸ್ ಫಾಂಕಯ್ತಾತ್. ಹ್ಯಾ ಅಂತರ್‌ಜಾಳ್ ಯುಗಾಂತ್ ಸರ್ವ್ ಕೊಂಕಣಿ ಲೋಕಾಂನಿ ಸಗ್ಳೆ ಆಕೊಡೆ ಮೊಡುನ್ ಎಕ್ವಟಿತ್ ಜಾಂವ್ಚಿ ಅಧಿಕ್ ಗರ್ಜ್ ಆಸಾ." ಮ್ಹಣಾಲೊ ಶ್ರೀ ಆಸ್ಟಿನ್ ಡಿ’ಸೋಜಾ ಪ್ರಭು ಹ್ಯಾ ಸಂದರ್ಭಾರ‍್ ಉಲವ್ನ್.

ಪುಸ್ತಕಾಚೆಂ ಉಗ್ತಾವಣ್ ಕೆಲ್ಲೊ ತೊಮಾಜಿನೊ ಕಾರ್ಡೊಜೊ ಮ್ಹಣಾಲೊ ಕೀ "ವೈವಿದ್ಯಮತಾ ಕೊಂಕ್ಣೆಚೆಂ ಬಳ್. ಹೆಂ ಜಗವ್ನ್ ದವರ್ಚೆಂ ಆನಿ ಹಾಕಾ ಪಾಟಿಂಬೊ ದಿಂವ್ಚಿ ಗರ್ಜ್ ಆಸಾ. ಹಾಚೆ ದ್ವಾರಿಂ ವಿವಿಧ್ ವರ್ಗಾಚ್ಯಾ, ವಿವಿಧ್ ಕುಳಿಯೆಂಚ್ಯಾ, ವಿವಿಧ್ ಪ್ರದೇಶಾಂಚ್ಯಾ, ವಿವಿಧ್ ಸಂಸ್ಕೃತೆಚ್ಯಾ, ವಿವಿಧ್ ಲಿಪಿಂನಿ ಬರಂವ್ಚ್ಯಾ ಲೋಕಾಕ್ ಸ್ಪೂರ್ತಿ ಆನಿ ಆದಾರ್ ದೀವ್ನ್ ಕೊಂಕ್ಣೆ ಥಂಯ್ ಎಕ್ವಟಿತ್ ಕರುಂಕ್ ಸಾಧ್ಯ್ ಆಸಾ. ಕೊಂಕ್ಣೆಂತ್ಲಿ ವೈವಿದ್ಯ್‌ಮತಾ ಕಾಡುನ್ ಉಡಂವ್ಕ್ ಪ್ರಯತ್ನ್ ಕರ್ಚೆಂ ಆನಿ ಕೊಂಕ್ಣೆಚೆಂ ಅಂತ್ಯ್ ಕರ್ಚೆಂ ಎಕ್‌ಚ್. ಆಪುರ್ಭಾಯೆನ್ ಮಲಯಾಳಮ್ ಲಿಪಿಂತ್ ಕೊಂಕಣಿ ಬರಂವ್ಚ್ಯಾ ಲೊಕಾಚೆರ್ ನಾಗಿರ್ ಲಿಪಿ ಥಾಪುನ್ ಕೇರಳಾಂತ್ ಕೊಂಕಣಿ ನಾಸ್ ಕೆಲಿ." ಮ್ಹಣಾಲೊ ತೊ.

ಫಕತ್ ತೀನ್ ವರ್ಸಾಂನಿ ಸಾಡೆತೀನ್ ಹಜಾರ್ ಕವಿತಾ ಬರವ್ನ್ ನವಾಲ್ ಕೆಲ್ಲ್ಯಾ ದೊ ಆಸ್ಟಿನಾಕ್ ತಾಣೆ ಅಭಿನಂದನ್ ಪಾಟಯ್ಲೆ. "ಗೊಂಯ್ಚೆ ಮಹಾನ್ ಕವಿ ದೆ. ಮನೋಹರ್ ಸರ್ದೇಸಾಯ್ ಆನಿ ದೆ. ಆರ್. ವಿ. ಪಂಡಿತ್ ಹಾಂಚ್ಯೊ ಕವಿತಾ ಪಾಸೂನ್ ಚಾರ್ ಪಾಂಚ್ ವೊಳಿಂಚ್ಯೊ ಮಟ್ವ್ಯೊ ಕವಿತಾ ಜಾವ್ನಾಸ್‍ಲ್ಲ್ಯೊ. ಜೇಸ್ ಫೆರ್ನಾಂಡಿಸಾನ್ ತೀಸ್ ಪುಸ್ತಕಾಂ ರೋಮಿ ಲಿಪಿಂತ್ ಬರಯ್ಲಿಂ ಆನಿ ಫಕತ್ ದೋನ್ ನಾಗಿರಿಂತ್ ಬರಯ್ಲಿಂ ಆನಿ ತಾಂಕಾಂ ನಾಗಿರಿಂತ್ ಬರಯಿಲ್ಲ್ಯಾ ಪುಸ್ತಕಾಕ್ ಸಾಹಿತ್ಯ್ ಅಕಾದೆಮಿ ಪುರಸ್ಕಾರ್ ಲಾಭ್ಲೊ. ತರ್ ಸಾಹಿತ್ಯ್ ಅಕಾದೆಮಿಚೊ ಪುರಸ್ಕಾರ‍್ ಸಾಹಿತ್ಯಾಚ್ಯಾ ಗುಣಾ-ಮಟ್ಟಾಕ್ ವ ಬರಯಿಲ್ಲ್ಯಾ ಲಿಪಿಕ್ ?" ಅಶೆಂ ತಾಣೆ ಸವಾಲ್ ಉಡಯ್ಲೆಂ.

ಹೊಚ್ ವಿಶಯ್ ಫುಡೆಂ ವರುನ್ ಬಾಪ್ ಪ್ರತಾಪ್ ನಾಯ್ಕ್ ಮ್ಹಣಾಲೆ ಕೀ "ಕೆದಾಳಾಯ್ ಭಾಸ್ ಪ್ರಮುಕ್ ಆನಿ ಲಿಪಿ ನ್ಹಯ್. ಲಿಪಿ ಫಕತ್ ಭಾಸ್ ಉತ್ರಾಂವ್ಚೆಂ ಹಾತೆರ್. ಲಿಪಿ ಭಾಶೆಚೆಂ ಏಕ್ ನ್ಹೆಸಾಪ್. ಆಯ್ಚ್ಯಾ ದಿಸಾ ಸಗ್ಳ್ಯಾ ಕೊಂಕಣಿ ಲೋಕಾನ್ ಆಪುಣ್ ಕೊಂಕಣಿ ಮ್ಹಣ್ ವಳ್ಕೊಂವ್ಚಿ ಗರಜ್ ಆಸಾ. ತ್ಯಾಚ್ ಭಾಶೆನ್ ಕೊಂಕಣಿ ಮ್ಹನ್ಶ್ಯಾನ್ ಖಂಚ್ಯಾಯ್ ಪ್ರದೇಶಾಚ್ಯಾ, ಜಾತಿಚ್ಯಾ ವ ಲಿಪಿಚ್ಯಾ ಕೊಂಕಣಿ ಮ್ಹನ್ಶ್ಯಾಕ್ ‘ಆಮ್ಚೊ ಲೋಕ್’ ಮ್ಹಣ್ ವಳ್ಕೊನ್ ಘೆಂವ್ಚಿ ಗರ್ಜ್ ಆಸಾ. ಜಾಯ್ತ್ಯೊ ವ್ಹಡ್ ಗಜಾಲಿ ಎಕೇಕಾಚ್ ವ್ಯಕ್ತಿಂನಿ ಕೆಲ್ಲ್ಯೊ. ತ್ಯಾ ದೆಕುನ್ ಕೊಂಕಣಿ ಮ್ಹನ್ಶ್ಯಾನ್ ಅಪಧಯ್ರ್ ಭಗಾನಾಸ್ತಾನಾ ಕೊಂಕ್ಣೆ ಖಾತಿರ್ ಆಪ್ಲಿ ದೇಣ್ಗಿ ದೀಂವ್ಕ್ ಫುಡೆಂ ಸರಾಜೆ. ಮ್ಹಣಾಲೆ ತೆ.

"ತೀನ್ ಹಜಾರ್ ಕವಿತೆಂಚೊ ಪುಸ್ತಕ್ ಮ್ಹಳ್ಯಾರ್ ಸಗ್ಳ್ಯಾ ಸಂಸಾರಾರ್ ಪಡ್ಚೊ ೩೫೦೦ ಕೊಂಕಣಿ ವಜ್ರಾಂಚೊ ಪಾವ್ಸ್." ಮ್ಹಣಾಲೊ ಕವಿ ಯೂಸುಫ್ ಶೇಕ್. "ಹೊ ಪಾವ್ಸ್ ಸಂಸಾರ್‌ಭರ್ ಶೆಣಾಯಿಲ್ಲೊ ದೊ. ಆಸ್ಟಿನ್ ಖಂಡಿತ್ ಜಾವ್ನ್ ‘ಕೊಂಕಣಿ ಕವಿತೆಂಚೊ ರಾಯ್’. ಆಮ್ಚೆಂ ದುರಾದೃಷ್ಠ್ ಮ್ಹಳ್ಯಾರ್ ಕೊಂಕ್ಣೆಂತ್ ಪ್ರಶಸ್ತ್ಯೊ ಸಾಹಿತ್ಯಾಕ್ ದೀನಾಂತ್ ಬಗಾರ್ ಲಿಪಿಕ್ ದಿತಾತ್. ಮಹಾನ್ ಸಾಹಿತ್ಯ್ ರಚ್ಪಿ ವಿಜೆಪಿ ಸಲ್ದಾನ್ಹಾ, ಜೊ. ಸಾ. ಅಲ್ವಾರಿಸ್ ಹಾಂಕಾಂ ಹೊ ಪುರಸ್ಕಾರ್ ಫಾವೊ ಜಾಂವ್ಕ್ ನಾ ಮ್ಹಳ್ಯಾರ್ ಆಮ್ಚೆಂ ದುರ್ಭಾಗ್ಯ್." ಮ್ಹಣಾಲೆ ತೆ.

ಕಾರ್ಯೆಂ ಶ್ರೀ ಆನ್ಸಿ ಪಾಲಡ್ಕಾಚ್ಯಾ ಪ್ರಸ್ತಾವನೆ ಸವೆಂ ಆರಂಭ್ ಜಾಲೆಂ. ಶ್ರೀಮತಿ ಸ್ಮೀತಾ ಥಾಂಬಾ, ಮಡ್ಗಾಂವ್ ಹಿಣೆ ಕವಿಚಿ ವಳಕ್ ಕೆಲಿ. ಶ್ರೀ ತೊಮಾಜಿನೊ ಕಾರ್ಡೋಜೊ ಹಾಣಿ ಪುಸ್ತಕಾಚೆಂ ಉಗ್ತಾವಣ್ ಕೆಲೆಂ. ಶ್ರೀ ಯೂಸುಫ್ ಶೇಕ್ ಹಾಣ್ ದೊ ಆಸ್ಟಿನಾಕ್ ಶೆಲೊ ಪಾಂಗುರ್ನ್ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ.




Ancy S. D'Souza, Paladka
E2-139 Diwan Apt III
Vasai Road East
Thane Dist - 401 210
Tel: 0250-2390225
Cell: 9320733213